సినిమా రంగంలో కూడా వ్యాపార రాజకీయాలు ఆసక్తికరంగా ఉంటాయి. ప్రముఖ నటుడు నాగార్జున తన కుమారుడు నాగచైతన్య సినిమా కోసం మరో సినిమా విడుదలను కొంత కాలం జాప్యం చేయిస్తున్నారని కధనాలు వస్తున్నాయి. నాగచైతన్య, కాజోల్ హీరో, హీరోయిన్ లుగా దడ సినిమాను తీస్తున్నారు.దడ సినిమా వచ్చే నెలలో కాని విడుదల కాదు. ఈలోగా ఎప్పుడో ఏడాదిన్నర క్రితమే షూటింగ్ పూర్తి చేసుకుని ,విడుదలకు సిద్దంగా ఉన్న హౌస్ ఫుల్ సినిమాను మరికొంతకాలం వాయిదా వేసుకోవలసిందిగా నాగార్జున ఈ సినిమా నిర్మాతను కోరారట. దానికి రెండు కారణాలు చెబుతున్నారు. కొత్త డైరెక్టర్ గా పరిచయం చేస్తున్నఅజయ్ భుయాన్ ఇంతకు ముందే హౌస్ ఫుల్ సినిమాకు దర్శకత్వం వహించారు. వివిధ కారణాల రీత్యా అది ఇంకా విడుదల కాలేదు. ఇప్పుడు దడ సినిమాకు దర్శకత్వం వహిస్తున్నారు. అజయ్ దర్శకత్వంలో విడుదలైన తొలి సినిమాగా పరిచయం చేయాలన్న ఉద్దేశ్యం ఒకటైతే, చిన్న బడ్జట్ సినిమా అయిన హౌస్ ఫుల్ విడుదల ప్రభావం పెద్ద బడ్జెట్ సినిమా అయిన దడ పై పడుతుందేమోనని సందేహం ఉండడం మరో కారణంగా చెబుతున్నారు. హౌస్ ఫుల్ నిర్మాత చంద్ర సిద్దార్ద తాను దడ సినిమా విడుదల తర్వాతే తన సినిమాను విడుదల చేస్తానని చెప్పారు. అలా చేస్తే ఈ సినిమాకు అవసరమైన సాయం చేస్తానని కూడా నాగార్జున చెప్పారని కూడా కధనాలు వచ్చాయి. ఏది ఏమైనా కొడుకు సినిమా కోసం తండ్రిగా నాగార్జున అన్ని జాగ్రత్తలు తీసుకుంటున్నారు. ఇందులో వ్యాపార సూత్రం కూడా ఇమిడి ఉంది కదా!
No comments:
Post a Comment